بسم الله الرحمن الرحيم وبه نستيعن
بما انه عندي امتحان ووقت الامتحانات الواحد بحب يفكر بأشياء ملهاش دخل بالامتحان خليني اشاركم هالفكرة
الذكاء والغباء! هلأ في عالمنا حاليا لما تطرح هالمصطلحين أول بخطر ببال الناس "شو وضع علامة الشخص المقصود؟" .. "شو معه شهادة؟" .. الخ الخ من المواضيع المرتبطه بالمنظومه التعليميه القائمة على مبدأ "احفظ تنجح" واظن كتير منا مع الزمن بنفر منها!
طيب لو نيجي للواقع شوي, الغباء والذكاء صفات ربانية بنفس الوقت صفات مكتسبه من المحيط!, يعني ممكن تنولد غبي بس لأنه اهلك معودينك على القراءة تصير اذكى من قدراتك الطبيعيه وممكن تكون ذكي بس لأنه اهلك راكنين انك ذكي تخف قدراتك أو بتوصل مرحلة انك ما بتستغلها
يعني الشغلة في النهاية ما بحكمها العقل بتحكمها الاراده والعزيمة .. يعني ممكن نلاقي ذكي ما بستغل قدراته أو بركن انه خلص فهم الموضوع من أول مره ووقت الجد الأخ بلتخم وببطل يعرف يجاوب وببين قدام الناس انه غبي .. وممكن نلاقي غبي بس عنده عزيمة والاخ ما بقعد الا لما يفهم الموضوع حتى لو بعد عاشر مره ووقت الجد بجاوب وببين قدام الناس انه هو الذكي زي ما توغوموري حل قضية لأحد اصدقائه بدون مساعده كونان (مثال عجيب صح؟ هاهاهاها)
في النهاية الموضوع بصفي "على قد ما بتعطي على قد ما بتاخد" لكن اسمحولي انا ضد هالمبدأ احيانا , ليش؟ بسيطه! مثال بسيط: أيام المدرسه كنت اتعب واسهر عشان ادرس وغيري كان يرتبوا كيف يغشوا وكل واحد أي جزء يدرس عشان يعملوا شبكة غش وبالاخر يجيبوا أعلى مني والاستاز يقدرهم! بالله عليكم بتتوقعوا بعد هيك موقف ما افقد الامل وما اتعب وازهق والخ من هاي الامور؟ .. وطبعا هالاشي مستمر يعني بنلاقي في التوجيهي مثلا ناس 11 سنة نايمة لما تيجي السنه رقم 12 بروحوا ببصموا وبيجبوا الاسئلة المقترحه وبياخدوا معدل وكل شي وينظرلهم انهم اذكياء وحضرتك اللي تعبت لسبب غير معروف ما بتبدع! أو مثلا في الجامعه لما تقدم امتحان والدكتور يصير يحط علامات من راسه بدل ما يصلح وهيك بكون القاري والشسمو واحد!
شوفوا انا ما بدي اكون مصدر تشاؤم واحباط بس نكون صريحين الشغلة ما بتيجي من طرف واحد (اللي هو الطالب بهاي الحالة) بل بتيجي برضه من الطرف التاني (اللي هو المسؤولين عن التعليم) واللي بدورهم بشجعوا الاساليب الايجابيه للتعليم وللدراسه وغيره
في النهاية زي ما بنحكي بكل نهاية خلي أملكم بالله كبير وباذنه سبحانه وتعالى ما في حدا بتعب الا وبلاقي تعبه على هاي الأرض
أخوكم العبد الفقير لله خالد الأنصاري
